Inspektorati Policor i Kosovës (IPK) ka hapur sot zyrat e reja në Mitrovicën e Veriut, në lagjen e Boshnjakëve, në rrugën “Çlirimi”, në objektin e Ministrisë së Punëve të Brendshme.

Në ceremoninë e përurimit morën pjesë Ministri i Punëve të Brendshme, Xhelal Sveçla, Kryeshefi i IPK-së, Kushtrim Hodaj, Kryetari i Komunës së Mitrovicës së Jugut, Erden Atiq, si dhe përfaqësues të IPK-së, Agjencisë për Regjistrim Civil (ARC) dhe Policisë së Kosovës.

Gjatë fjalimeve, ata nënvizuan rëndësinë e hapjes së zyrave të reja për përmirësimin e shërbimeve, rritjen e efikasitetit të IPK-së dhe forcimin e besimit të qytetarëve në sundimin e ligjit në Kosovë. Kryeshefi Hodaj falënderoi MPB-në dhe ARC-në për mbështetjen në realizimin e këtij projekti.

Ministri Sveçla tha se ky hap do të ndihmojë në forcimin e rendit dhe ligjit në Mitrovicën e Veriut, si dhe në rritjen e integritetit dhe besueshmërisë së Policisë së Kosovës.